Abrimos a inscrición para o curso de descenso de barrancos «iniciación» e xa temos xente apuntada.
Nuns días publicaremos a/s data/s e as horas. De todas formas podedes facer a inscrición no lateral dereito ou en https://xistra.org/inscricion-a-curso-de-barrancos/
Vimos de recibir a información do campamento de verán que organiza a Federación Galega de Montañismo para este mes de xullo.
O prezo subvencionado é de 130€ e inclúe desprazamento, comidas, durmidas e curso de técnicas de montañismo.
Tendes que ler con atención o ficheiro pdf adxunto, en especial os requisitos e o tipo de licenza mínima que solicitan dende a Federación.
Se tendes dúbidas, por favor chamade canto antes.
Lembrade que por ser unha actividade federativa, os nenos que participen tamén terán puntos no baremo de final de ano. Lembrade que máis de 3 puntos significan axudas económicas.
Sabemos que é un pouco precipitado, e que moitos xa teredes reservados campamentos urbanos ou similares, pero cremos que pode ser moi interesante e que axudará á socialización e madurez dos rapaces.
Para os nenos e rapaces está a 2ª PROBA DA COPA GALEGA DE ESCALADA BASE
sábado, 22 de xuño de 2013
A CORUÑA
Organizan FGM-SOCIEDAD DE MONTAÑA ARTABROS
Rogamos que os que xa competiron, e obtiveron clasificación na anterior proba de Vigo, intenten asistir.
A Federación porá un autobús a prezo subvencionado de 5€/praza. Sairá o sábado ás 8:45h do quiosco da Praza de España. A competición comezará sobre as 10:30h na Coruña. O fin da competición previsto será sobre as 14:00h. Hai que levar para comer. Haberá un tempo libre pola tarde e o retorno a Vigo será con chegada as 19:00h á Praza de España. Poden ir adultos acompañando ós nenos.
Pablo chegando á meta.
Para os corredores por montaña temos:
CAMPIONATO GALEGO INDIVIDUAL DE CARREIRAS POR MONTAÑA
domingo, 23 de xuño de 2013
III CHANDREXA TRAIL-CHANDREXA DE QUEIXA-FGM-RUNNING SPORT TRAIL-CLUB ALPINO OURENSAN
Lembrade que os corredores tendes unha camiseta especial para as carreiras.
Tamén as mulleres que corran representando a Xistra e rematen a proba terán, ademais da camiseta, unha axuda de 10€.
Por favor, contactade co club para informar de se queredes participar.
Por outra banda, sabendo que o Campamento FEDME de agosto ten un prezo un pouco elevado, estamos pendentes de se a Federación vai dar algunha axuda ou subvención para acudir. Esta actividade está interesante porque ademais de pasalo ben, ten o valor engadido de ser 2 puntos de baremo para cada participante.
De todas formas estamos valorando a realización dunha actividade infantil estival no Refuxio de Torrebarrio (León) que sairía moito mellor de prezo. Esta actividade será interna do club e non entra no baremo federativo (falando claro, que non da puntos!!)
Tamén temos que facer pronto o CURSO DE BARRANCOS só para socios: As datas teñen que ser pronto (nestas 3 semanas próximas) polo que rogamos que os interesados vos poñades contacto co club canto antes. O prezo sería gratuíto.
Non deixedes pasar estas oportunidades: abrimos as listaxes dende este momento.
Como sempre hai xente nova, debedes saber que os puntos son premios económicos a fin de ano. O que máis participe leva máis cartos. Como mínimo para entrar no reparto de premios é conseguir 3 puntos (moi fácil).
Ascensión ó Fontefría
A XXVI Marcha de Vivac da FGM celebrouse esta fin de semana pola Serra do Xurés. Se a participación foi un pouco escasa, isto non desmereceu a actividade. Organizada e levada en horario, permitiu a realización de forma tranquila, o que facilitou que tódolos participantes gozaran das fermosas e graníticas vistas desta serra.
A auga foi máis escasa do que estaba previsto, pero en ningún momento fixo perigar a actividade. O vivac foi realizado baixo o Nevosa. A noite foi tranquila e alumeada polas estrelas e a Vía Láctea.
Trepada no tramo final do Fontefría.
No final da marcha en San Paio (Lobios), despois de refrescarse no bar da aldea, uns participantes gozaron das duchas do Refuxio federativo de Albite e outros das pozas do río Caldo. Realizouse a clausura da actividade no restaurante A Entrimeña, entregando uns agasallos conmemorativos e funcionais.
Participaron 3 socios de Celtas, 4 de Fontiñas, 1 de Budiño Trail, 6 de Trevinca M.G. e 9 de Xistra.
Marcha de Vivac 2013
Podedes ver vídeos da subida neste enlace: aquí
Xa estamos nos últimos días para a inscrición na Marcha Galega de Vivac.
Recomendamos a tódolos socios e outros federados que procedan a inscribirse canto antes. Sería lamentable que por inscribirse no último momento, algúns participantes poidan quedar sen agasallo. Precisamos destes datos para facer unha boa previsión e organización. Grazas ós que xa estades apuntados. Lembrade que a inscrición faise a través da nosa web, no enlace da dereita -> https://xistra.org/inscricion_xxvi_marcha_galega_vivac/
Podio Xistra
Esta fin de semana foi celebrada a primeira proba da Copa Galega de Escalada Base (infantil) coa participación de 10 socios federados de Xistra.
Practicando escalada
Felipe de Frutos acadou o segundo posto na súa categoría, e luciu a nosa camiseta durante a entrega de trofeos.
O resto dos socios infantís participaron de distinta maneira: uns en competición regulada e outros, os máis, tomando contacto co rocódromo. Finalmente todos levaron un agasallo pola súa presenza.
Esta fin de semana celebrouse a última marcha de 50 km antes do descanso do verán. Logo, en setembro, temos a marcha de Ribeira.
Mal tempo e cambios de trazado, pero como ven sendo habitual con presenza dos nosos socios. Probablemente foi a derradeira marcha a Teixido dende Ferrol, porque o próximo ano queren facela circular saíndo dende a Malata. Parabéns a tódolos que fixestes a camiñada.
Algúns dos socios de Xistra antes da saída.
Esta fin de semana pasada tivo lugar a Andaina de Salceda. O noso socio e amigo Manolo (Andarín) traballou arreo para que todo saíse, como xa ven sendo habitual, moi ben.
Unha asistencia importante, boa presenza de socios de Xistra, e un tempo excepcional foron as nosas mellores impresións.
Subindo a Faro Budiño – 50km Salceda.
Lamentablemente media decena de socios de Xistra inscritos, finalmente non puideron asistir por motivos persoais xurdidos no último momento. Aínda así, a nosa presenza e participación viuse moi ben representada con máis de 15 marchadores e case todos puideron rematar sen problemas os 50km.
Como ven sendo habitual Sonia de Galifisio acudiu ó final da marcha para atender ós nosos «andaríns».
Xunto ó río Miño – Salceda 50km
Podes ver fotos en picasa, facebook e http://bretema.uvigo.es/adaforna/ANDAINA/2013/FOTOS/FOTOS.htm !!
Xa temos xente apuntada para a marcha con vivac que celebraremos na Serra do Xurés.
Vimos de remitir a tódolos clubs unha circular cos últimos datos da actividade, incluído un mapa do percorrido. Rogamos a tódolos socios de Xistra interesados que efectuedes a vosa inscrición canto antes.
Podedes ver máis datos no documento adxunto. 20130528 circular II clubs
Síguenos en Telegram 
O Clube de Montaña Xistra recibiu a concesión de subvencións do Concello de Vigo para o desenvolvemento da súa actividade nas tempadas 2013, 2014, 2015, 2016, 2017, 2018, 2019, 2020, 2021, 2022, 2023 e 2024.
O Clube de Montaña Xistra recibiu as concesións de subvencións da Xunta de Galicia para o desenvolvemento de actividades deportivas correspondentes ós anos 2012, 2013, 2014, 2015, 2016, 2017, 2018, 2019, 2020, 2021, 2022, 2023 (recibido en 2024) e unha axuda especial de reactivación Covid en 2021.
Tamén unha axuda para adquisición de material deportivo en 2022 e en 2019.
